నదిని

నేను 

నేనవడానికి ముందు నదిని

*** 

నడవడానికి ముందే ప్రవహించిన వాణ్ణి

నెమ్మదించి నడుస్తున్నాను కానీ

ప్రవహించి పరుగెలెత్తిన వాణ్ణి

వేగం ఒడుపు తెలిసినవాణ్ణి

*** 

ప్రవహించడానికి ముందే 

తరగల తలెత్తి

జలపాతమైనవాణ్ణి

దూకినవాణ్ణి

ఎత్తు తెలిసిన వాణ్ణి

కిందకి చూడ్డం తెలిసిన వాణ్ణి

నేల చేరడంలో నేర్పరిని

*** 

దూకడానికి ముందు 

ఒక శిఖరమైనవాణ్ణి 

పైకి చూడ్డం తెలిసినవాణ్ణి

గగన విస్తీర్ణం కొలవగలిగినవాణ్ణి 

విస్తరించడం తెలిసినవాణ్ణి

ఎగరడం అనివర్యమైనవాణ్ణి

మేఘమవగల మెలకువగలవాణ్ణి

*** 

అంతకు ముందు 

ఒక బిందువైనవాణ్ణి

సింధువైనవాణ్ణి

భరించడం తెలిసిన వాణ్ణి

*** 

నెమ్మదించి నేనిలా నడుస్తున్నాను కానీ

ప్రవహించి పరుగెలెత్తగలవాణ్ణి

నడకల గమ్యం తెలిసినవాణ్ణి

నదిని. 

*** 

అలలై

నవ్వుతున్నవాణ్ణి

నడుస్తూ విస్తరిస్తున్నవాణ్ణి

నడకతో ఎగరగలవాణ్ణి

నడుస్తున్నా…

ప్రవాహమవగలవాణ్ణి

*** 

నడుస్తున్నాను గానీ

అక్షరమై ఎగురుతున్నవాణ్ణి

నడుస్తూనే ఆకుపచ్చగా విస్తరిస్తున్నవాణ్ణి

అడవిగా మారుతున్నవాణ్ణి

నిశ్శబ్దంగా ఒక నినాదమవుతున్నవాణ్ణి

నదీనినాద గమ్యం తెలిసినవాణ్ణి.