చిన్ని పిట్ట

అన్నీ అలసిన రాత్రులే అయినా 
ఎన్నో ఉదయాలు ఓ చిన్ని పిచ్చుక 
చిలుక పలుకులతో 
చిరునవ్వులు నింపుతాయి.

ముడుచుకున్న ముద్ద మందారాలు 
ఓ ముద్దుకై ఎదురుచూస్తాయి. 
ముందునాటి సాయంవేళ 
మొగ్గలైన మల్లెలు విచ్చుకొని 
సిగ్గుల మొగ్గలవుతాయి.

కలవరిస్తున్న అన్నింటినీ పలకరించి 
చిట్టి పలుకుల ఆ చిన్ని పిట్ట 
నా అరచేత వాలుతుంది 

ఇంతలో మమ్మల్ని చూడలేదంటూ 
అలిగిన సీతాకోకలు 
నా కోకను పట్టి లాగి
చెక్కిలిపై ఇంద్రధనస్సును 
ముద్దుగా ఇచ్చి ఎగిరిపోతాయి 

పొదివి పట్టుకున్న ఆ పొట్టి పిట్ట 
పొట్టకు నీళ్ల  కుండను పెట్టి 
షడ్రుచుల పచ్చడి కుండకై పరుగెడతాను. 

ఓ అందమైన ఉగాది నా చిరునవ్వై పూస్తుంది